122197
PRIORITY

Is-Sigurtà: Patt Ewropew għas-Sigurtà

F’dinja mqallba, iffaċċjata bi gwerer, pandemiji, aktar kriminalità u theddid ċibernetiku, aħna nappellaw għal Patt Ewropew għas-Sigurtà għal Ewropa li tipproteġi liċ-ċittadini tagħha. Nafu x’jeħtieġ li jsir; issa wasal iż-żmien li nagħtu r-riżultati. Neħtieġu Difiża Ewropea komuni vera, kompatibbli man-NATO, u li ninvestu fit-teknoloġiji tad-difiża tal-futur. Irridu nipproteġu aħjar il-fruntieri esterni tagħna u nimmaniġġjaw aħjar il-flussi migratorji, iżda wkoll niżguraw is-sigurtà interna tagħna fir-rigward tal-ġlieda kontra t-terroriżmu, il-kriminalità organizzata kif ukoll it-theddid spazjali u ċibernetiku. Iffaċċjata b’ordni ġeopolitiku ġdid, l-Ewropa jeħtiġilha wkoll tipproteġi l-interessi tagħna billi tifhem u ssaħħaħ ir-rwol tagħna fid-dinja, filwaqt li titkellem b’vuċi waħda fix-xena globali. Fil-leġiżlatura li jmiss, irridu Patt Ewropew għas-Sigurtà biex nipproteġu lill-Ewropej kollha.

Is-Sigurtà: Patt Ewropew għas-Sigurtà

Nipproteġu

  • Il-fruntieri esterni tagħna mal-FRONTEX bħala gwardja sħiħa tal-kosta u tal-fruntiera, mgħammra b’setgħat ta’ implimentazzjoni. Aħna niddefendu u nippromwovu l-Patt il-Ġdid dwar il-Migrazzjoni u l-Ażil biex niġġieldu t-traffikanti tal-bnedmin, inwaqqfu l-migrazzjoni illegali, u nindirizzaw il-kawżi ewlenin tal-migrazzjoni permezz ta’ soluzzjonijiet Ewropej komuni, bħal infrastrutturi fiżiċi, u ftehimiet ma’ pajjiżi ġirien bħat-Tuneżija jew il-Marokk.
  • L-industriji strateġiċi tagħna minn kompetizzjoni inġusta kif ukoll l-infrastruttura kritika tagħna kontra akkwiżizzjonijiet barranin u pressjonijiet illeġittimi minn pajjiżi awtokratiċi. Dan jinkludi t-tfassil ta’ Strateġija Ewropea għall-Portijiet biex nipproteġu l-portijiet marittimi.
  • Uliedna fl-ispazju diġitali, billi noħolqu ambjent online sikur bi Pjan ta’ Azzjoni Ewropew kontra l-bullying ċibernetiku u l-abbuż tat-tfal. Il-bullying fl-ispazju online għandu jitqies bħala reat kriminali madwar l-Ewropa kollha.
  • Il-bniet u n-nisa tagħna, billi nikkriminalizzaw il-vjolenza kontra n-nisa kullimkien fl-Ewropa u napplikaw l-istess standards biex nikkastigaw lill-awturi tar-reati.
  • L-istat tad-dritt tagħna, bi Strument tal-Istat tad-Dritt ġdid għall-Ewropa f’idejn il-Qorti tal-Ġustizzja tal-UE (QĠUE): il-QĠUE tingħata l-kompitu ta’ rieżami regolari tas-sitwazzjoni attwali fl-Istati Membri u s-setgħa li timponi sanzjonijiet, inklużi sanzjonijiet finanzjarji, jekk ikun meħtieġ. Irridu nevitaw li l-istat tad-dritt jintuża ħażin politikament jew jiġi injorat minn kwalunkwe Stat Membru.

Noħolqu

  • Il-momentum biex il-Kooperazzjoni Strutturata Permanenti (PESCO) tiġi approfondita sabiex naħdmu lejn Unjoni Ewropea tad-Difiża b’forzi Ewropej integrati fuq l-art, il-baħar u l-ajru sal-2030, li tikkomplementa l-forzi militari nazzjonali, allinjati mal-mudell il-ġdid tal-forza tan-NATO, b’kapaċità ta’ skjerament rapidu ta’ forza permanenti u disponibbli immedjatament. Din il-forza għandha tiġi estiża gradwalment lejn Korp Ewropew billi jiġu assenjati truppi u elementi tal-forza addizzjonali ġejjin mill-Istati Membri, filwaqt li jiġu approfonditi r-rabtiet operazzjonali u l-interoperabbiltà tagħhom. Għandna nippromwovu l-Politika ta’ Sigurtà u ta’ Difiża Komuni u nqajmu mill-ġdid l-industrija militari tal-Ewropa, niżguraw il-mobbiltà militari madwar l-UE u nżidu l-infiq nazzjonali tal-Istati Membri fuq id-difiża u investimenti konġunti ġodda.
  • Unjoni Ewropea tad-Difiża vera b’baġit iddedikat u miżjud, Kummissarju Ewropew għad-Difiża, u Formazzjoni tad-Difiża fil-Kunsill tal-UE.
  • Aġenzija Ewropea għall-Proġetti ta’ Riċerka Avvanzata fil-Qasam tad-Difiża (DARPA) biex tagħti spinta u tippromwovi r-riċerka fl-innovazzjonijiet u t-teknoloġiji tal-futur għal skopijiet ta’ difiża. Fl-istess ħin, irridu nneħħu l-ostakli għall-finanzjament tal-kumpaniji Ewropej tad-difiża u nilħqu l-għan ta’ akkwist konġunt ta’ 35% tat-tagħmir tad-difiża.
  • Kwartieri ġenerali ċivili-militari konġunti fil-livell Ewropew li jgħaqqdu l-istrumenti ċivili u militari sabiex isir użu sħiħ mill-approċċ integrat tal-UE fil-ġestjoni tal-kriżijiet, mill-ippjanar strateġiku sat-twettiq effettiv tal-missjoni jew tal-operazzjoni.
  • Brigata Ċibernetika Ewropea kompletament operazzjonali għall-ġlieda kontra l-attakki ċibernetiċi, u forom ġodda ta’ gwerra ibrida mit-terroristi, il-kriminalità organizzata, l-indħil barrani u d-diżinformazzjoni, li tipproteġi l-infrastruttura kritika tagħna, il-libertà tal-media u l-indipendenza tal-ġudikatura.
  • Strateġija ta’ Sigurtà tal-UE lejn iċ-Ċina, il-Mediterran u l-Afrika fit-tul u li tħares ’il quddiem. L-Ewropa trid tiddefinixxi b’mod proattiv ir-rwol tagħha fid-dinja u tasserixxi l-interessi tagħha, speċjalment fir-rigward tal-migrazzjoni mhux ikkontrollata, l-enerġija u l-provvista ta’ materja prima, u l-indirizzar taż-żieda fl-awtoritarjaniżmu, filwaqt li tiżviluppa r-reżiljenza tagħha u twissijiet bikrija effettivi qabel ma jinqalgħu l-kunflitti. Għandu jinħoloq Kunsill Ewropew tas-Sigurtà, magħmul minn ministri tal-Istati Membri responsabbli għas-sigurtà interna u esterna, sabiex jirreaġixxi malajr għall-emerġenzi u jiżviluppa approċċ integrat għall-kunflitti u l-kriżijiet.

Insaħħu

  • L-Europol għandu jsir “Eurocops”: aġenzija tal-pulizija kompletament operattiva b’setgħat ta’ infurzar fir-rigward tal-ġlieda kontra t-terroriżmu, l-abbuż tat-tfal, il-korruzzjoni, u l-ġlieda kontra l-kriminalità organizzata transfruntiera, inkluż it-traffikar tal-bnedmin u l-kuntrabandu tad-drogi u l-armi. Aħna nappoġġjaw il-prinċipju tal-moviment liberu, iżda ma għandu jkun hemm l-ebda moviment liberu għall-kriminali. Irridu ntejbu wkoll il-protezzjoni tal-vittmi tat-terroriżmu u nsaħħu l-Mandat ta’ Arrest Ewropew.
  • Id-demokrazija tagħna, niddefenduha kontra d-diżinformazzjoni u l-indħil barrani, nissalvagwardjaw l-indipendenza tas-sistemi ġudizzjarji tagħna, il-libertà tal-media u l-funzjonament tal-istituzzjonijiet demokratiċi tagħna. L-Ewropa trid tibqa’ fuq quddiem nett tal-appoġġ globali għad-demokrazija u - flimkien man-NATO - toħloq Ċentru għar-Reżiljenza Demokratika.
  • Id-diplomazija tal-UE, inwassluha għas-seklu 21: irridu nistabbilixxu Ministru għall-Affarijiet Barranin tal-UE, nagħtu rwol aktar b’saħħtu lis-Servizz għall-Azzjoni Esterna, nippromwovu siġġu komuni tal-UE fi ħdan is-sistema multilaterali tan-Nazzjonijiet Uniti u istituzzjonijiet multilaterali oħra u nimxu minn unanimità għal maġġoranza kwalifikata fid-deċiżjonijiet tal-Politika Estera u ta’ Sigurtà.
  • Iċ-ċittadini tagħna bi Pjan Ewropew għar-Reżiljenza tal-Kontinġenzi Ċivili biex insaħħu r-reżiljenza tal-Ewropej f’każ ta’ kriżijiet, bħall-COVID-19, u biex niżguraw li l-awtoritajiet lokali u statali jkunu jistgħu jirreaġixxu aktar malajr u b’mod immirat għall-emerġenzi.
  • L-Ukrajna u l-ġirien tagħna tal-Lvant kontra l-gwerra ta’ aggressjoni Russa. Irridu nilħqu paċi sostenibbli bi strateġija robusta lejn ir-Russja u Tarka tas-Sigurtà Ewropea konġunta bejn l-UE u n-NATO. Strateġija Ewropea tat-tkabbir li tħares ’il quddiem għall-Ukrajna, il-Moldova u l-Balkani tal-Punent li tevalwa kull pajjiż kandidat individwalment abbażi ta’ riżultati konkreti filwaqt li tissalvagwardja l-kapaċità ta’ integrazzjoni meħtieġa tal-Unjoni.

Table of content

    © Il-Grupp tal-PPE, 2012-2024. Kull dritt riżervat.