Is-saltna tad-dritt prijorità - von der Leyen lil Casa

Waqt l-ewwel laqgħa tal-Grupp tal-PPE fil-Parlament Ewropew, il-kandidat tal-PPE għall-Presidenza tal-Kummissjoni Ursula von der Leyen assigurat li fost il-prijoritajiet għall-ħames snin li ġejjin se jkun hemm l-ambjent, l-Ukrajna, u l-aktar pertinenti, is-saltna tad-dritt.

Waqt il-laqgħa tal-grupp, l-MEP u l-Kap tad-Delegazzjoni tal-PN David Casa tkellem dwar ir-riżultati tal-elezzjonijiet tal-PE u enfasizza l-importanza li s-saltna tad-dritt f’Malta tkun imtejba wara kampanja mimlija tensjoni mill-Gvern Laburista karatteristizzata minn attakki frekwenti fuq il-ġudikatura.

Casa rrefera għal “żviluppi importanti dwar is-saltna tad-dritt”, fejn iddeskriva l-“attakk terribbli” fuq il-ġudikatura, il-midja, u ż-żewġ MEPs tal-PN fl-aħħar snin, billi ttimbrahom bħala tradituri tul il-kampanja.

“Is-sitwazzjoni tas-saltna tad-dritt f’Malta marret għall-agħar b’mod sinifikanti u x’aktarx se tkompli tiddeterjora,” wissa Casa.