L-EPP jipprevjeni lill-irziezet tal-familja milli jiġu kklassifikati bħala li jniġġsu industrijali

Il-Grupp PPE jilqa' l-ftehim bejn il-Parlament u l-Istati Membri tal-UE biex ma jqisux irziezet tal-baqar bħala impjanti tal-industrija.

"Irridu inqas tniġġis, iżda aktar innovazzjoni. Il-Liġi l-ġdida dwar l-Emissjonijiet tal-Industrija se tipproteġi n-natura mingħajr ma toħloq aktar burokrazija għan-negozji. Irridu nnaqqsu l-emissjonijiet industrijali, iżda rridu nagħmluh flimkien mal-industrija, il-bdiewa u l-SMEs, mhux kontrihom," qal Radan Kanev MEP, in-negozjatur ewlieni tal-Parlament Ewropew dwar id-Direttiva dwar l-Emissjonijiet tal-Industrija wara l-ftehim informali ta’ dalgħodu.

Il-ftehim huwa suċċess ta' Kanev, li rnexxielu jżomm l-aktar parti importanti tal-mandat tal-Parlament fin-negozjati, mogħti minn maġġoranza wiesgħa fil-plenarja bejn il-partiti.

“Aħna żammejna l-ifrat barra mill-ambitu tad-Direttiva dwar l-Emissjonijiet tal-Industrija. Il-Kummissjoni Ewropea issa trid tagħmel valutazzjoni tal-impatt ġdida u tikkomunika b'mod ġust u trasparenti mal-bdiewa qabel ma terġa' lura fil-Parlament bi proposta leġiżlattiva ġdida dwar l-inklużjoni tal-baqar. Neħtieġu salvagwardji għall-bdiewa tal-UE, l-hekk imsejħa 'klawżola ta' reċiproċità', qal Kanev.

Il-klawżola ta' reċiproċità tipprovdi assigurazzjoni li fil-futur, prodotti agrikoli importati se jikkonformaw ma' rekwiżiti ambjentali komparabbli bħal dawk fis-seħħ għall-bdiewa Ewropej taħt id-Direttiva dwar l-Emissjonijiet Industrijali.