Peter Agius iħabbar għajnuna diretta għal-lingwa Maltija fil-Parlament Ewropew

“Il-Malti Lsien Pajjiżna u rridu niddefenduh fl-Ewropa u ser nagħmel minn kollox għal dan.”

Hekk stqarr il-MPE Peter Agius, hekk kif saħaq l-importanza tal-użu tal-lingwa Maltija fi ħdan il-Parlament Ewropew. Agius kompla biex jgħid li waħda mill-ewwel inizjattivi li ħa f’postu bħala MEP kienet li iltaqa mad-Direttriċi Ġenerali għall-Interpretazzjoni fil-parlament Ewropew. Agius kompla biex jgħid li waqt il-laqgħa tiegħu mad-Direttriċi Ġenerali, hu spjegala ċar u tond li l-Parlament irid jitkellem il-Malti.  

“Id-DG Agnieska Walter Drop spjegatli li wara l-inċidenti li kien hemm aktar kmieni din is-sena b’nuqqas ta’ interpreti, issa qed isir ħafna aktar sforz, tant li l-Parlament Ewropew għadu kemm approva grant speċjali ta’ 40,000 euro lill-Universita’ ta’ Malta biex ngħinu fit-taħriġ għal interpreti ġodda Maltin. Infetaħ ukoll taħriġ speċjalizzat għall-Maltin biex jitħarrġu fis-sengħa tal-Interpretazzjoni direttament fi Brussell. Dan kollu qed isir grazzi għall-presjsoni li għamilna favur il-Malti,” iddikjara Agius.   

Madankollu, MPE Peter Agius stqarr li issa qed jistenna wkoll li l-Gvern Malti jagħmel il-parti tiegħu, kemm billi jappoġġja bi sħiħ dawn l-isforzi kif ukoll billi jara li huwa stess fil-fatt juża l-Malti, kemm internament kif ukoll fil-komunikazzjoni mal-istituzzjonijiet Ewropej.

B’Peter Agius jikkonkludi biex jgħid li “llum huwa l-Jum Ewropew tal-Lingwi fejn l-Ewropa trid tirrikonoxxi li jekk ma titkellimx il-ingwi tal-popli tkun bla vuċi.