“Mhux ser nistrieħu sakemm issir ġustizzja sħiħa ma Daphne” - David Casa

Casa jorganizza attività ta' kommemorazzjoni fil-Parlament Ewropew bl-isem 'Daphne 5 snin ta' ġustizzja miċħuda'.
 
L-MEP David Casa illum organizza attività fil-Parlament Ewropew, biex ifakkar il-ħames anniversarju mill-assassinju ta’ Daphne Caruana Galizia.

Il-President tal-Parlament Ewropew, Roberta Metsola, fetħet l-attività b’diskors indirizzat lil Membri Parlamentari Ewropej, ġurnalisti, u rappreżentanti tas-soċjetà ċivili Ewropea, li kienu preżenti. Roberta Metsola tenniet l-impenn tal-Parlament Ewropew favur is-saltna tad-dritt u l-protezzjoni tal-ġurnalisti. Il-President Metsola sostniet "illum nibku għat-telfa ta' waħda minna, mara, omm, bint. Iżda dan in-niket irid jiġi trasformat f’determinazzjoni li nagħmlu aktar, li nkunu aktar impenjati u nkunu aktar magħquda fid-difiża tal-midja u l-libertà tal-istampa”.

Min-naħa tiegħu, David Casa afferma mill-ġdid l-impenn tiegħu li jaħdem għal ġustizzja sħiħa għal Daphne Caruana Galizia. "Il-ġustizzja ma tfissirx biss il-kundanna ta' min poġġa l-bomba. Trid tfisser ġustizzja għall-istejjer tagħha u t-tmiem tal-impunità, li dawk li hi kixfet għadhom igawdu minnha sal-lum".

Casa sellem lill-NGOs li jaħdmu fuq quddiem nett u rringrazzjahom tal-ħidma tagħhom u qal li l-Parlament Ewropew se jkompli jappoġġjahom fit-tfittxija tagħhom għall-verità u l-ġustizzja.

L-MEP Ramona Strugariu li, flimkien ma’ David Casa, hija Co-President tal-Media Working Group, indirizzat ukoll lill-folla. Hi tenniet l-impenn tagħha fil-ġlieda favur il-libertà tal-istampa f’isem Daphne. Hija talbet biex id-Direttiva proposta mill-Kummissjoni kontra s-SLAPP, tissejjaħ "Liġi ta' Daphne" b’unur lil Daphne Caruana Galizia, kif fil-fatt kienet ukoll talbet il-Viċi President tal-Kummissjoni Vera Jourova.

Fl-okkażjoni tal-ħames anniversarju mill-qtil ta’ Daphne Caruana Galizia, il-Parlament Ewropew se jħares lejn is-sitwazzjoni f’Malta, b’dibattitu fil-plenarja tal-Parlament Ewropew fis-17 ta’ Ottubru u se jorganizza wkoll it-tieni edizzjoni tal-Premju Daphne Caruana Galizia għall-Ġurnaliżmu.

Casa, li kien strumentali fil-ħolqien tal-Premju, stqarr; "Jalla Daphne tispira lil oħrajn biex jiġġieldu għal dak li jemmnu fih u jżommu sodi f’xogħolhom meta jitolbu biex dawk fil-poter jagħtu kont ta’ għemilhom".