Il-Fond Soċjali għall-Klima ta’ Casa jsir liġi wara l-approvazzjoni finali tal-Parlament Ewropew

Il-Parlament Ewropew illum approva l-aktar pakkett ambizzjuż tal-klima li se jopera, b'mekkaniżmu soċjali ta' bosta biljuni mogħtija permezz tal-Fond Soċjali għall-Klima li ħadem fuqha David Casa.

"Il-Fond Soċjali għall-Klima huwa l-aktar miżura soċjali sinifikanti fit-triq lejn in-nett żero," qal l-MEP David Casa.

Casa spjega li l-fond ta’ €86.7 biljun se jipproteġi lill-familji u n-negozji iż-żgħar mill-effetti tat-tranżizzjoni klimatika.

“Għandna salvagwardji robusti dwar kif il-gvernijiet se joperaw dan il-Fond, speċjalment permezz ta’ rekwiżiti stretti, bl-għan li jiġi żgurat li l-għajnuna tmur fejn se jkun hemm l-akbar impatt. Il-Kummissjoni se tevalwa pjanijiet dettaljati dwar kif il-miżuri jkunu mfassla u implimentati, bil-fondi jitħallsu biss mat-tlestija tal-istadji u l-miri.”

Iċ-ċittadini Maltin mistennija jibbenefikaw minn żieda ta’ għaxar darbiet aktar fil-fondi taħt il-ftehim proviżorju, fejn ġew mobilizzazzati ftit aktar minn €60 miljun. Dwar iż-żieda għas-sehem għaċ-ċittadini Maltin, Casa qal li “kien hemm raġunijiet b’saħħithom li jsir dan, favur il-poplu Malti u ninsab kuntent ħafna li ksibt dan ir-riżultat”.

Casa kien in-negozjatur ewlieni għal-Fond Soċjali għall-Klima f'isem il-Kumitat għall-Impjiegi u l-Affarijiet Soċjali, u ħadem flimkien mal-Olandiża Esther de Lange f'isem il-Kumitat għall-Ambjent u s-Sigurtà fl-Ikel.

Miżuri fil-Fond Soċjali għall-Klima se jkunu ffinanzjati fil-biċċa l-kbira minn fondi tal-UE, b’rata ta’ kofinanzjament minoritarju mill-Istati Membri.

“Il-punt tal-Fond hu li jbaxxi l-kontijiet tal-enerġija u li l-Ewropa titbiegħed mill-fjuwils fossili. Nistgħu niksbu dan, kemm billi ninvestu fl-effiċjenza tal-enerġija kif ukoll fl-enerġija rinnovabbli. Bil-Fond Soċjali għall-Klima, irrid nara l-investimenti jaslu f’idejn iċ-ċittadini, b’aktar pannelli solari, apparat aktar effiċjenti, insulazzjoni aħjar, u alternattivi aktar ekoloġiċi għat-trasport.”

Il-Fond Soċjali għall-Klima huwa l-pedament tal-politika soċjali tal-pakkett adattat għall-55, li jindirizza kwalunkwe effett sproporzjonat li l-miżuri tal-klima jista’ jkollhom fuq familji vulnerabbli u mikrointrapriżi.