Delegazzjoni ta' Bdiewa Maltin jipparteċipaw għall-ewwel darba fil-Kungress tal-bdiewa fi Brussell

Din il-ġimgħa kienet waħda mportanti għal numru ta’ bdiewa Maltin, partikolarment żgħażagħ li ppartiċipaw għall-ewwel darba fil-Kungress tal-Bdiewa organizzat mill-Partit Popolari Ewropew. 

L-għaxar edizzjoni laqqgħet flimkien iktar minn 500 bidwi, raħħala u stakeholders oħra fil-qasam minn madwar l-Unjoni Ewropeja kollha bil-għan li jikber l-għarfien u l-promozzjoni tal-argrikoltura fl-Ewropa, l-iżvilupp rurali filwaqt li jingħata sostenn għal-irwol fundamentali tal-bdiewa żgħażagħ f’dan is-settur.
 
Id-delegazzjoni Maltija kienet tinkludi bdiewa żgħażagħ mill-Fondazzjoni MaYA (Malta Youth in Agriculture) mmexxija minn Jeanette Borg, kif ukol raħħala minn Għawdex u Steven Zerafa li huwa riċerkatur tar-robotika u kif din tista' tintuża fil-biedja. Il-Kungress ffoka fuq l-isfidi ewlenin ta’ bħalissa fl-agrikoltura, inkluż l-importanza tal-ilma għall-biedja fis-snin li ġejjin; kif se jiġi rriklamat aħjar il-prodotti agrikolu Ewropew u kif l-Ewropa se tħeġġeġ iktar żgħażagħ jżommu ħaj dan is-settur tant importanti għall-bniedem.
 
Il-bdiewa Maltin ipparteċipaw fid-diskussjoni li kienet tinkludi l-parteċipazzjoni tal-Kummissarju Ewropew il-ġdid għall-biedja Christophe Hansen u numru ta' MEPs u atturi oħra fil-qasam tal-politika agrikola. L-MEP Peter Agius hu wieħed mill-Ewro Parlamentari tal-EPP li jappoġġja l-kungress u anke Young Farmer’s Prize li nagħta waqt il-kungress. 

“Għall-ewwel darba, l-Maltin qed jipparteċipaw fil-Kungress tal-Bdiewa tal-EPP fi Brussell - ser nara li nuża bi sħiħ ir-rwol tiegħi bħala MEP biex il-Maltin ikunu involuti fit-teħid tad-deċiżjonijiet fl-Ewropa,” qal Dr. Agius.
 
Il-Kungress tal-Bdiewa tal-EPP huwa intiż biex jiffoka l-politika Ewropea biex jiżdiedu ż-żgħażagħ fl-agrikoltura li naqsu bi 30% fl-aħħar 20 sena.