Casa jappella lill-Kummissjoni biex tieħu azzjoni konkreta dwar l-iskandlu tax-xiri tal-voti

L-MEP David Casa talab lill-President tal-Kummissjoni Ewropea Ursula von der Leyen biex tieħu azzjoni konkreta fuq l-iskema korrotta tax-xiri tal-voti mill-Partit Laburista.

"Il-partit fil-gvern jaħdem bħal organizzazzjoni kriminali mifnija bil-frodi, falsifikazzjoni u tixħim biex jixtru l-voti, li qed itellfu l-kredenzjali demokratiċi tagħna," sostna l-MEP.

Casa rrefera għal diversi aħbarijiet ta’ korruzzjoni li ħarġu matul is-snin u sostna li din hija waħda mill-aktar gravi.

"Filwaqt li l-kriminalità saret sinonima ma' dan il-Gvern, l-aħħar aħbarijiet huma inkwetanti minħabba li l-iskema mmanipulat elezzjonijiet bl-użu ta' fondi maħsuba għal persuni b'diżabilità severa."

Casa appella lill-Kummissjoni biex tagħmel użu mill-għodda li għandha inkluż il-monitoraġġ tal-istat tad-dritt u l-mekkaniżmi ta’ kundizzjonalità.